Historia

HISTORIA CURTIA

Los oríxenes del Muséu de Belles Artes d’Asturies remóntense a 1969, cuando la Diputación Provincial d’Asturies y el Conceyu d’Uviéu constituyeron la Fundación Pública “Centru Provincial de Belles Artes” (más tarde “Centru Rexonal de Belles Artes”), anque la pinacoteca nun s’inauguró hasta’l 19 de mayu de 1980. Cuntaba daquella con siete sales, nes que s’esponíen 78 obres.

Patiu del Palaciu de Velarde cuando yera Institutu de Relixoses del Santu Ánxel

Traza del patiu del Palaciu de Velarde un poco depués d’abrir como Muséu

La so primer sede foi’l Palaciu de Velarde, construyíu ente 1765 y 1770 pol arquitectu Manuel Reguera (1731-1798) pal rexidor Pedro Velarde Calderón y Prada. El palaciu, qu’ente 1905 y 1971 usárese como institutu poles Relixoses del Santu Ánxel, foi adquiríu en 1971 y remodeláu por Florencio Muñiz Uribe ente 1973 y 1976. A estes obres siguieron, ente 1979 y 1980, l’estudiu y restauración de los sos primeros fondos pictóricos.

Desque se remocicó polos arquitectos Fernando Nanclares y Nieves Ruiz, en 1986 abrió al públicu la Casa d’Oviedo-Portal, un inmueble de 1660 diseñáu por Melchor de Velasco Agüero (¿-1669) pal tamién rexidor Fernando de Oviedo-Portal.Dambos edificios, amás del llamáu de servicios, construyíu a mediaos del sieglu XX y apegáu al Palaciu de Velarde, volvieron remocicase ente 1993 y 1996 por Jorge Hevia y Cosme Cuenca. Unos años más tarde, a últimos de la década de los noventa, empezó a falase yá de la necesidá d’acometer una ampliación nueva que dexare, per un llau, esponer más obra y, per otru, dotar a la institución d’almacenes nuevos. Desque se consiguieron xuntar los inmuebles apegaos a la Casa d’Oviedo-Portal (los númberos 10, 12, 14 y 16 de la cai de La Rúa y 1 de la Plaza d’Alfonso II’l Castu), nel 2006 convocóse’l concursu, que ganaría l’arquitectu Francisco Mangado y la constructora SEDES.

La obra, cofinanciada con cargu a los Fondos FEDER de la Unión Europea, allargóse ente’l 2007 y el 2013, abriéndose a la fin l’edificiu nuevu al públicu’l 31 de marzu del 2015. Hasta entós, nos sos trenta y cinco años d’historia, el Muséu, que sigue siendo gratuitu, visitáronlu 1.495.191 persones.

Fachada de la Casa d’Oviedo-Portal hacia 1981

LA FORMACIÓN DE LA COLECCIÓN

La colección del Muséu de Belles Artes d’Asturies formóse de mano a partir de los fondos de la Diputación Provincial vieya y de lo que yera’l Muséu de Pintures de l’Academia Provincial de Belles Artes de San Salvador d’Uviéu. Dende entós foi aumentándose con adquisiciones, donaciones, heriedos, depósitos y daciones, ente les que destaca sobre manera la dación en pagu de la Colección Pedro Masaveu Peterson.

Parte de la colección permanente n’edificiu de l’Ampliación (2015). Semeya: Marcos Morilla.

Gracies a too esto, el Muséu cunta na actualidá con una de les meyores colecciones públiques d’arte d’España, integrada por más de 15.000 pieces que van dende’l sieglu XIV hasta’l XXI y qu’incluyen nomes tan destacaos como los d’El Greco, Zurbarán, Ribera, Murillo, Carreño de Miranda, Goya, Miguel Jacinto y Luis Meléndez, Sorolla, Piñole, Valle, Aurelio Suárez, Luis Fernández, Picasso, Dalí, Miró, Tàpies y Barceló.