Tol añu ye Antroxu

De la señardá pola xeografía española amosada hasta l’añu 1962, Orlando Pelayo (Xixón, 1920-Uviéu, 1990) derivó a la de la historia. Nunes declaraciones feches por esti artista a Michel Ragon en 1963, el pintor señaló la necesidá que per aquella dómina sintió de pasar d’una imaxe física del so país, cuayada nes sos Cartografíes de l’ausencia, a otra de calter psíquicu, qu’a partir d’aquel momentu, y hasta 1972, manifestóse principalmente nes sos series titulaes Retratos apócrifos y La pasión según Don Xuan. Ye como si desque se recuperó l’espaciu, col que s’averare dende’l puntu de vista formal a l’astracción, llegare pa Pelayo el momentu d’habitalu. Pero nun hubo nesti cambéu de rexistru, que lu llevó de lo astracto otra vez a lo figurativo, propósitu nengún de rotura, sinón más bien de transición emocional. Ello ye que’l mesmu pintor esplicó cómo llegó un momentu en que de forma natural los accidentes del terrén que podíen vese nos sos paisaxes foron añudándose hasta formar estos personaxes nuevos. En dambos casos podía apreciase’l mesmu deséu d’esplorar el yo personal. Los seres qu’empezaron a apaecer nes sos teles nun suponíen la plasmación de suxetos concretos, tratábase ensin más de personaxes al traviés de los que se buscaba, más allá de la representación de les sos traces físiques, la sintetización d’una dómina mítica de la nuestra hestoria, la del Sieglu d’Oru.

En Tol añu ye Antroxu amuésase a cuatro d’esos personaxes garraos de les manes en círculu y n’actitú de baillar. El puntu de vista camudó. Yá nun ye’l cenital de les sos composiciones anteriores, sinón qu’agora’l pintor asítiase frente a ellos. La manera con que s’imponen estos seres, tanto pictórica como emocionalmente, rescampla. Quiciabes seya esa dimensión que tienen, a metá de camín ente la historia y la lleenda, la que-yos da la fuercia psicolóxica tan escomanada que tienen.

Otra manera, a pesar d’esa capacidá pa identificar el motivu, la pintura y el xuegu colos medios plásticos siguen siendo nes obres d’esti artista soberanos. Los empasties son bien potentes. La pincelada faise llarga, fluyida y perviolenta. La paleta escueye les games de verde, ocre, negru y blancu. Les atmósferes alienden con un gran dramatismu. La lluz, que surde o que s’impón dende dientro del propiu cuadru, revela la cualidá d’espectros o formes larvaries que tien cada personaxe. Estos siempre apaecen captaos como nun momentu de rellumada que los alluma a ellos y dexa en penumbra’l restu de la composición. Por eso, el mesmu pintor refirióse a les figures de los sos cuadros col calificativu de fulguraciones primero que figuraciones, vistes al traviés d’un rescamplíu. L’espaciu que les arredola nun ye más qu’una proyección d’esi llau allucinatoriu que tienen les mesmes. Dalgunes d’estes composiciones paecen tar captaes nun momentu de velea.