Biblioteca del Muséu de Belles Artes d’Asturies
La biblioteca del Muséu de Belles Artes d’Asturies ye un centru pal estudiu y investigación histórico-artística que pon una atención especial na documentación de los fondos del Muséu. Empezó a formase en 1980 y tien na actualidá una de les colecciones sobre Arte más importantes d’Asturies, qu’incluye monografíes, publicaciones periódiques, obres de referencia y catálogos de puyes. Esti tipu de publicaciones suponen lo más d’una colección que supera los 30.000 volúmenes y que contién unos 500 títulos de publicaciones periódiques, amás d’otru tipu de material como folletos, catálogos de mano d’esposiciones, separates, recortes de prensa y otres publicaciones menores. Dispón de títulos sobre toles disciplines artístiques, n’especial sobre pintura; amás de sobre museoloxía, colecciones de museos, caltenimientu y restauración, historia y, por supuestu, toles publicaciones editaes pol Muséu.
A los sos fondos foron sumándose una parte de la biblioteca del historiador del arte Diego Angulo, adquirida en 1995, y la biblioteca personal de los artistes Amador y Luis Fernández, amás del archivu d’ésti últimu, que convierte al Muséu nel principal centru d’investigación d’esti pintor nacíu n’Asturies. Aparte, el Muséu cunta con dellos fondos documentales, como l’archivu personal de Mariano Pola, y tán depositaos los de los arquitectos Juan Vallaure, Julio Galán Gómez y Julio Galán Carvajal.
Ente’l so fondu antiguu, la biblioteca atesora una partida de títulos destacaos de la historiografía artística española: venticuatro anteriores a 1801 y más de cuatrocientos correspondientes al sieglu XIX, munchos d’ellos con grabaos y encuadernaciones bien interesantes. Pue destacase nesta sección la serie de llibros de viaxes, que ye un grupu representativu ente los que se publicaron sobre España nel postrer terciu del sieglu XVIII y tol sieglu XIX.
Fondos antiguos de la Biblioteca
