El Muséu de Belles Artes d’Asturies ye un Organismu Autónomu adscritu a la Conseyería d’Educación y Cultura del Principáu d’Asturies, financiáu pol Principáu d’Asturies y el Conceyu d’Uviéu y ta xestionáu al traviés de la Fundación Pública “Centru Rexonal de Belles Artes”.
L’órganu xestor d’esta fundación ye la Xunta de Gobiernu, que ta integrada por catorce miembros: el Presidente, el Vicepresidente, nueve vocales (seis nomaos pola Comunidá Autónoma y trés pol Conceyu d’Uviéu), una persona designada pola Conseyería competente en materia d’economía, quien ostente la titularidá de la dirección xeneral con competencia en materia de museos y el director del centru, qu’exerce les funciones de secretariu.
Según la Llei del Principáu d’Asturies 6/2003 (art. 3), pertenez a la Xunta “aprobar los planes d’actividaes del centru, señalar les directrices xenerales d’actuación, aprobar el proyectu de presupuestu anual previa conformidá del Conceyu d’Uviéu, visar la cuenta xeneral del presupuestu y d’alministración del patrimoniu pa la so aprobación pola Comunidá Autónoma, aprobar l’inventariu de bienes del centru, nomar y apartar al director, proponer a la Comunidá Autónoma l’aprobación y modificación de la plantiya de personal del centru y alcordar l’exerciciu de les acciones pertinentes en defensa de los intereses del mesmu”.
Presidente
D. Genaro Alonso Megido, Conseyeru d’Educación y Cultura del Principáu d’Asturies
Llicenciáu en Filoloxía Hispánica pola Universidá d’Uviéu, con Premiu Estraordinariu de Llicenciatura. Ye Doctor en Filoloxía Hispánica (Llingua Española) pola Universidá de Llión. Catedráticu d’Institutu dende 1984 a 1994; Inspector d’Educación dende 1 d’ochobre de 1994, dende’l 2000 al 2015 exerció como Inspector Xefe de Distritu. Miembru de númberu de l’Academia de la Llingua Asturiana dende 1990 y presidente de l’Asociación d’Inspectores d’Educación d’Asturies (ADIDE) ente’l 2001 y el 2007. Ye autor de dellos trabayos d’investigación sobre la llingua castellana. Amás, tien munchos trabayos d’investigación sobre la llingua asturiana y tamién publicaciones sobre temes d’educación.
Vicepresidente
D. Roberto Sánchez Ramos, Conceyal de Cultura del Conceyu d’Uviéu
Ye conceyal del Conceyu d’Uviéu, poles llistes d’Izquierda Xunida, dende 1991. Na actualidá tien los cargos de Tercer Teniente d’Alcalde del Conceyu d’Uviéu, conceyal de Gobiernu del Área de Cultura y Festexos Populares, presidente de la Fundación Municipal de Cultura, presidente de la Sociedá Uviedina de Festexos y vicepresidente del Muséu de Belles Artes d’Asturies.
Vocales
D. Vicente Jesús Domínguez García, Viceconseyeru de Cultura del Principáu d’Asturies
Doctor en Filosofía. Dende 1996 ye Profesor titular de Filosofía na Universidá d’Uviéu. Foi Decanu de la Facultá de Filosofía y Vicerrector d’Estensión Universitaria y Comunicación nesa universidá. Na actualidá ye Viceconseyeru de Cultura y Deporte del Principáu d’Asturies. Les sos llinies d’investigación y publicaciones principales son Filosofía Griega y Filosofía y Cine.
Dña. Liliana Pérez Iglesias, Xefa del Serviciu de Xestión Presupuestaria de la Conseyería de Facienda y Sector Públicu
Llicenciada en Ciencies Económiques (rama Economía Xeneral), pola Universidá d’Uviéu. Funcionaria de carrera del Cuerpu Superior d’Alministradores, Resolución de la Conseyería de Facienda, Economía y Planificación de 24 de marzu de 1993 (BOPA de 31 de marzu). Adscrita a la Dirección Xeneral d’Economía y Planificación con desempeñu del trabayu como Xefe de la Sección de control y siguimientu d’inversiones públiques (periodu 1994-1999) y dende entós na Dirección Xeneral de Presupuestos como Xefe del Serviciu de Presupuestos y/o Xestión presupuestaria.
D. Leopoldo Tolivar Alas
Catedráticu de Derechu Alministrativu na Universidá d’Uviéu y, enantes, nes de Murcia y Llión. Doctor en Derechu poles Universidaes de Bolonia y Uviéu, ye Técnicu Urbanista pol INAP. Ye Presidente de la Real Academia Asturiana de Xurisprudencia y correspondiente, ente otres, de la Real Academia de Ciencies Morales y Polítiques. Ye miembru de númberu permanente del Real Institutu d’Estudios Asturianos.
Dña. Inmaculada D’Ocón Navaza
Realizó estudios de Derechu nes Universidaes de Valencia y Uviéu. Dende’l 2007 hasta’l 2014 desenvuelve l’actividá profesional na Obra Social y Cultural de Cajastur, como Coordinadora de los Centros de Pensionistes. Nel 2014 nómenla Directora Xeneral de la Fundación Cajastur-Liberbank, cargu qu’ocupa hasta avientu del 2016. Simultáneamente, dende l’añu 2009, forma parte del Patronatu del Muséu de Belles Artes d’Asturies, en representación de la Xunta Xeneral del Principáu.
Dña. Elisa Collado González
Llicenciada en Xeografía y Historia, rama de Prehistoria, pola Universidá Complutense de Madrid (1987). Realizó un Cursu Especializáu de Museoloxía nel Institutu d’Estudios Profesionales de la Fundación Universitaria San Pablo (C.E.U.) de Madrid (1991/1992) y dellos cursos sobre arqueoloxía, museoloxía y patrimoniu cultural. Contratada pola Conseyería de Cultura pa realizar llabores d’arqueóloga nel castru d’El Castriyón de Cuaña (1989). Desempeñó llabores d’arqueóloga y xeres d’estudios histórico-documentales, catalogación y tratamientu de materiales na empresa GABINETE ARQUEOLÓGICO S.L. (1991-2001). Participó como técnicu museólogu de la U.T.E. OPUS na ellaboración del Rexistru Informáticu de los Fondos Museográficos del Muséu Arqueolóxicu d’Asturies (2000-2001), institución de la que foi Directora (2001-2011). Vocal del Centru Rexonal de Belles Artes del Principáu d’Asturies dende’l 2015.
Dña. Mª Trinidad Rodríguez Díez
Llicenciada en Ciencies Químiques pola Universidá d’Uviéu (1975). Catedrática de Física y Química n’Enseñanza Secundaria. Foi Conceyal del Conceyu de Xixón de 1991 a 1995 y Directora Xeneral de Cultura del Gobiernu del Principáu d’Asturies dende 1995 a 1999. Socia del Atenéu Xovellanos de Xixón dende 1990, foi Vocal de la so Xunta Directiva hasta’l 2013, desempeñando’l cargu de vicepresidenta del 2009 al 2013. Vicesecretaria d’UNICEF-Asturies del 2002 al 2004 y Vicepresidenta d’UNICEF-Asturies del 2004 al 2007. Ye miembru de la Comisión de Patrimoniu Cultural del Principáu d’Asturies .
D. Luis Feás Costilla
Llicenciáu en Ciencies de la Información pola Universidá Complutense de Madrid y doctor n’Estética y Teoría de les Artes pol Departamentu de Filosofía de la Universidá d’Uviéu. Docente y conferenciante. Periodista y críticu d’arte y cine. Xuráu de premios y certámenes nacionales d’arte. Comisariu independiente d’esposiciones.
D. Francisco Javier Fernández Conde
Historiador y sacerdote católicu español, catedráticu d’Historia Medieval de la Universidá d’Uviéu. Ye doctor n’Historia de la Ilesia pola Universidá Gregoriana de Roma, y n’Historia pola Universidá d’Uviéu, onde ye profesor eméritu. Ye amás párrocu de seis congregaciones asitiaes nel conceyu asturianu de Candamu.
Dña María Ablanedo Reyes
Titulada Superior de Música na especialidá de Cantu, ye profesora por oposición nel Conservatoriu del Valle del Nalón, del que foi directora nueve años. Realizó conciertos como solista; foi profesora de técnica vocal na Capiya Polifónica “Ciudá d’Uviéu” y Coru Universitariu; foi directora del Coru Llíricu, col que participó en delles óperes y zarzueles; realizó xeres de dramaturxa pa la Fundación Municipal de Cultura d’Uviéu. Dende la radio ayudó a la divulgación de les actividaes culturales de la rexón. Ye conceyal nel Conceyu d’Uviéu y presidenta de la Comisión d’Estudiu Rexonal de Cultura del Partíu Popular.
Dña. Ana Taboada Coma
Abogada. Na actualidá ye 1.ª Teniente d’Alcalde del Conceyu d’Uviéu y Conceyal de Gobiernu d’Información y Participación. A lo llargo d’años compaxinó l’abogacía cola docencia, primero na Escuela de Práctica Xurídica d’Uviéu y depués como profesora nel Máster de l’Abogacía de la Universidá d’Uviéu. Forma parte de la Comisión d’Igualdá del Colexu d’Abogaos d’Uviéu de magar se creó.
Dña. M.ª Luisa Ponga Martos
Llicenciada en Derechu pola Universidá d’Uviéu, ye técnica n’escedencia de la Fundación Tripartita pa la Formación nel Empléu; de la so sede territorial n’Asturies foi coordinadora dende l’añu 1998 hasta xunu del 2012, fecha na que s’incorpora al gabinete del Conseyeru de Sanidá del Principáu d’Asturies. Enantes trabayó na Alministración rexonal como técnica del Cuerpu Superior d’Alministradores, realizando funciones en materia de formación ocupacional y continua, aparte de na xestión de programes de formación y empléu cofinanciaos pol Fondu Social Européu. Foi amás Presidenta de la Comisión de Trabayu pa la Ellaboración del Reglamentu de la CES y de la Comisión de Sanidá Pública. Tamién formó parte del Conseyu Asesor de Radio Televisión Española.
Secretariu
Alfonso Palacio Álvarez, Director del Muséu de Belles Artes d’Asturies
Doctor n’Historia del Arte pola Universidá d’Uviéu, depués d’una estancia d’investigación nel Musée National d’Art Moderne, Centre Georges Pompidou de París ente los años 2004 y 2006, pasó a ocupar una plaza de profesor nel Departamentu d’Historia del Arte y Musicoloxía de la universidá mentada ente’l 2006 y el 2013. Dende esi añu ye Director del Muséu de Belles Artes d’Asturies. Les sos llinies d’investigación empobináronse al arte asturianu, español y internacional de los sieglos XX y XXI, qu’alredor d’ello publicó un númberu importante de llibros y artículos. Tamién asistió a munchos congresos tanto d’algame nacional como internacional, amás d’impartir conferencies y comisariar esposiciones sobre estos temes.
Patronu d’honor
Plácido Arango Arias
Empresariu y mecenes d’orixe asturianu, rexón a la que siempre tuvo vinculáu. Foi vocal del Patronatu del Muséu del Prado ente 1986 y el 2007, añu en qu’asumió la presidencia hasta’l2012, siendo reconocíu depués como Patronu d’Honor de la pinacoteca. Ente 1987 y el 2006 presidió tamién la Fundación Príncipe d’Asturies. Ye amás vocal de los patronos de la Fundación BBVA y del Metropolitan Museum of Art de Nueva York, ente otros cargos destacaos n’ámbitu de la cultura y les belles artes.
