Casa d’Oviedo-Portal

El 16 de xunu de 1986 abrió al públicu la Casa d’Oviedo-Portal, segundu edificiu históricu pel que s’amplió’l Muséu de Belles Artes d’Asturies. Adquiríu en 1982, remocicáronlu los arquitectos Fernando Nanclares y Nieves Ruiz ente 1985 y 1986. Esta intervención consistió fundamentalmente en consolidar la estructura y volve-y el calter palaciegu, valtando los tabiques de divisiones interiores construyíos cuando s’iguó pa viviendes en 1878, y reconstruyendo, amás, dos plantes baxo cubierta na parte anterior y posterior del edificiu.

L’EDIFICIu

Instalada nel númberu 8 de la Cai de la Rúa, la Casa d’Oviedo-Portal construyóse en 1660 según les traces del arquitectu cántabru Melchor de Velasco Agüero (¿-1669) pa Fernando de Oviedo-Portal, rexidor de la ciudá. Trátase d’un exemplu claru de clasicismu tardomanierista, mui enraigonáu n’Asturies dende últimos del sieglu XVI hasta mediaos del XVII.

La Casa d’Oviedo-Portal ocupa un solar estrechu d’unos 400 m² de superficie y articúlase alredor d’un patiu adinteláu, sofitáu na parte baxa por cuatro columnes d’orde toscanu. Esti patiu ye, depués del medieval de la Casa de la Rúa (güei, La Rúa 15), el más vieyu que caltién l’arquitectura señorial uviedina.

L’edificiu repártese en trés pisos: el baxu, onde taben les dependencies y servicios comunes (cocina, bodega, despenses, retretes, cochera, corte, etc.); el primer pisu, parte noble de la casa, onde taben la sala, los gabinetes y los cuartos de familia y convidaos, amás del comedor y les alcobes del mayorazu; y el segundu y últimu pisu, usáu pa cuartos de dormir de la familia y de los criaos, cuartos de tar y de llabor, y onde tovía se puen ver los restos de lo que yera un retrete (sala 7 actual).

La fachada, estrecha y allargada, ta construyida con cantería d’arenisca y l’alzáu ye sobriu y cenciellu, ensin malapenes decoración y con una distribución simétrica de los buecos.

Vista xeneral de les sales de la segunda planta. Semeya: Pedro Pardo.

DISTRIBUCIÓN DE LES COLECCIONES

Na actualidá, la Casa d’Oviedo-Portal acueye bona parte de les colecciones del sieglu XIX del Muséu, siendo la pintura asturiana del sieglu XIX la protagonista principal. Asina, la xeneración romántica ta representada nel segundu pisu (sales 7, 8 y 9) con obres de Dionisio Fierros, Ignacio Suárez Llanos, Luis Álvarez Catalá y Ignacio León y Escosura, ente otros; mentes que la xeneración realista, allugada nel primer pisu (sales 12, 13 y 14) y patiu, tien en Luis Menéndez Pidal, José Uría y Uría, Juan Martínez Abades y Ventura Álvarez Sala a dalgún de los sos representantes principales.

Vista xeneral de la sala 12. Semeya: Pedro Pardo.

Otros espacios d’esti edificiu destínense a amosar, con calter rotatoriu, una escoyeta pequeña de los fondos de dibuxu (segundu pisu, sala 10), grabáu (segundu pisu, sala 11), fotografía (primer pisu, sala 15), artes industriales (primer pisu, sala 16) y carteles de cine (hall d’accesu a l’Ampliación).