El Palaciu de Velarde ye la sede más vieya del Muséu de Belles Artes d’Asturies. Adquiríu en 1971 a la Congregación de Relixoses del Santu Ánxel de la Guarda, que lu dedicare a colexu de primera y segunda enseñanza femenina, adaptóse a les sos nueves necesidaes y usos museográficos cola intervención de los arquitectos Florencio Muñiz Uribe (ente 1973 y 1976 y en 1980) y Cosme Cuenca y Jorge Hevia (1992-1995), nesta última ocasión dientro d’un plan integrador qu’intervieno tamién sobre la Casa d’Oviedo-Portal. Ye Bien d’Interés Cultural dende’l 25 de mayu de 1983 (BOE 12 de xunetu de 1983).
Patiu del Palaciu de Velarde. Semeya: Marcos Morilla.
El Palaciu de Velarde, na cai Santa Ana esquina cola cai San Antonio, ye un exemplu perfectu d’arquitectura palaciega academicista del sieglu XVIII. Diseñáu por Manuel Reguera González (1731-1798), construyóse ente 1765 y 1770 pal rexidor uviedín Pedro Velarde Cienfuegos.
El Palaciu de Velarde ta concebíu como un gran bloque cúbicu de planta cuadrangular, con cuatro fachaes exentes y articuláu alredor d’un patiu. La fachada principal (cai Santa Ana) dispónse sobre un muriu planu, ensin movimientu en planta, y nella destaquen principalmente los balcones con saliente del primer pisu y l’escudu nobiliariu que s’asitia na parte alta de la exa central. La fachada meridional, mirando pal xardín, repite’l mesmu esquema de distribución reticular anque con una mayor cencellez.
L’edificiu repártese en trés plantes: la baxa, onde destaca’l patiu cuadráu, formáu por dos arcos carpaneles per llau que se sofiten sobre unes columnes toscanes monumentales, y la escalera imperial, que da accesu a la primer planta, zarrada n’orixe pa protexer les estancies interiores de los rigores climáticos de la rexón. Na segunda, la más reformada de toes, sobresal especialmente la solana, compuesta por cinco arcos carpaneles sobre columnes toscanes de pocu altor que repiten la idea de la planta baxa.
El Palaciu de Velarde acueye lo más escoyío de les colecciones históriques del Muséu (sieglos XIV-XIX) y dedica un espaciu (planta baxa) a les esposiciones temporales.
En xubiendo pela escalera imperial del edificiu, onde pue contemplase’l Retablu de Santa Marina, llégase al primer pisu, dedicáu al arte de los sieglos XIV al XVIII, con obres d’autores tan significativos como Fernando Gallego, Pedro Berruguete, Luis de Morales, El Greco, Zurbarán, Ribera, Murillo, Carreño de Miranda y Miguel Jacinto Meléndez.
El segundu pisu (anguaño zarráu al públicu) ta dedicáu a la pintura y escultura españoles de los sieglos XVIII y XIX, con obres de Francisco de Goya y Lucientes, y de los más destacaos pintores románticos (como Genaro Pérez Villaamil, Federico de Madrazo y Antonio María Esquivel) y realistes (Carlos de Haes, Ignacio Pinazo y Aureliano de Beruete, ente otros). L’espaciu central conságrase a la pintura de gran formatu y incluye llenzos como Tipos vascos. Guipúzcoa, de Joaquín Sorolla.
Públicu nuna de les sales del Palaciu de Velarde. Semeya: Marcos Morilla.
