En marzu del 2015 inauguróse l’Ampliación del Muséu de Belles Artes d’Asturies, una actuación bien esperada cofinanciada pola Unión Europea al traviés del Programa Operativu FEDER d’Asturies 2007-2013. L’edificiu actual correspuende a la llamada Fase I del proyectu y ta dedicáu a amosar los fondos d’arte contemporaneu del Muséu.
L’Ampliación foi diseñada pol arquitectu navarru Patxi Mangado y executada pola constructora SEDES S.A., ganadores del concursu convocáu nel 2006. Llevántase enriba l’espaciu ocupáu enantes por cinco inmuebles allugaos nos númberos 10 (Casa de Solís-Carbajal, s. XVII), 12 (Casa d’Omaña, s. XVI), 14 y 16 de la cai La Rúa y nel númberu 1 de la plaza d’Alfonso II el Castu (últimos del sieglu XIX-primeros del XX), que los foi obteniendo progresivamente’l Principáu d’Asturies. El primeru foi la Casa de Solís-Carbajal, adquirida en 1997. Depués foron incorporándose por adquisición, permuta y espropiación los otros cuatro edificios.
Nel proyectu destaquen dellos elementos. De primeres, la fachada doble, que garra una dimensión de telón urbanu y que s’aldovina al traviés de los buecos desnudos de los edificios anteriores. Pa Mangado esti ye un componente de gran intensidá formal, visual y funcional, onde pue facese una llectura en base a les capes de la memoria.
Tres d’ella confórmase la escalera pública, que dexa acceder a tolos niveles del Muséu. Los espacios de doble y triple altor de la entrada, en diálogu coles fachaes históriques na midida que s’averen y aparten d’elles siempre nel interior, amuesen tamién un xuegu interesante de formes y volúmenes.
Otru elementu reseñable na Ampliación son los vacios, sobre manera los del gran llucernariu o patiu, espaciu de referencia nel conxuntu. Tanto nésti como nos llucernarios del segundu pisu resáltase una lluz buscada, esquisitamente sutil. Amás, los remates d’éstos na cubierta recuerden, según l’arquitectu, los cimborrios y capiyes de la catedral.
Espaciu ente les dos fachaes de l’Ampliación. Semeya: Juan Rodríguez.
Atriu de l’Ampliación. Semeya: Juan Rodríguez.
Na Ampliación espónse una escoyeta de les colecciones d’arte contemporaneu de los sieglos XX y XXI del Muséu, siguiendo un discursu cronolóxicu qu’empieza na planta baxa p’acabar na segunda. Dispón amás d’un espaciu independiente dedicáu al escultor asturianu José María Navascués, instaláu na planta -1.
Una de les sales de l’Ampliación. Semeya: Marcos Morilla.
El discursu arrinca na planta baxa cola pintura lluminista de Joaquín Sorolla (sala 17), siguío d’otros dos espacios (sales 18 y 19) dedicaos a la pintura y escultura españoles de primeros del sieglu XX, con nomes tan destacaos como Regoyos, Anglada-Camarasa, Casas y Mir, ente otros. Sigue, yá nel primer pisu (sales 20 a 23), la renovación postimpresionista, l’Arte Nuevu y de vanguardia asturianu y español. Equí podemos atopar obres d’artistes asturianos como Evaristo Valle, Nicanor Piñole, Joaquín Vaquero, Paulino Vicente, Aurelio Suárez y Luis Fernández, que dialoguen con Picasso, Miró, Dalí, Blanchard, Gargallo y Gutiérrez Solana. Nel segundu pisu (sales 24 a 27) espónse la producción más renovadora de los artistes posteriores a la guerra civil española, amás de les últimes manifestaciones del arte. Nomes como los d’Antonio Suárez, Bernardo Sanjurjo, Alejandro Mieres, Rivera, Oteiza, Hernández Pijuan, Tàpies, Barceló y Equipo Crónica son dalgunes de les paraes obligaes nestes sales.
